Friday, 12 June 2015

أعتذر وشكرا


الصورة للتعبير فقط 


اليوم حبيت اتكلم عن شي يصير للكثيرين من المدونين وللأسف البعض يعتبره تكبر أو عدم احترام وهو عدم وضع بوست لشي وصل لنا. أحب أوضح ان ليس كل ما يوصل لنا من دعوات أو هدايا أو حتى مواد لتجربتها هو بالأساس تم التواصل فيه معانا .

صار للأسف الكثيرين من الاشخاص اللي لهم علاقات واسعه بالاعلام ببيع وتوزيع بيانات المدونين كأنها سلعه !

 نتفاجأ بكثير من الاحيان بجرس باب البيت والا بسايق لتوصيل شي ولما نفتحه ممكن يكون شي يؤكل أو منتجات تجميل أو عنايه بالبشرة وغيرها الكثير ومعاها ملاحظه بصيغه أمر تقول نزلو البوست على (حساب تويتر,انستغرام ,الفيسبوك) والهبه اليديدة السنابشات ! 

شخصيا هالاشياء ما اكتب عنها ولا أفكر اني احطها سواء بالمدونه أو الانستاغرام. بأي حق ترسلون الاشياء و (تأمرون) ان نجربها أو حتى بدون تجربه ان نكتب لكم بوست! وطبعا لازم البوست يكون على ذوقهم والطامة الكبرى هي لما يرسلون أشياء اصلا شخصيا ما أقدر استخدمها من منتجات للبشرة كالمكياج والكريمات لان أصلا بشرتي ما تتحمل استخدم اي شي لانها تتهيج بسرعه أو يكون الاكل فيه شي ما اقدر اكله يسبب لي حساسيه او ماأحبه . 

للأسف هذول ما يفكرون الا بنفسهم وبتسويق منتجاتهم أيا كانت. ممكن غيري يكون عنده هالشي عادي وينزل بوست ويكتب اي شي والبعض عنده تحفظات من هالشي مثلي.

أسمحولي أقول لهالاشخاص والشركات أعتذر وشكرا ومانبي منكم شي وياريت لوتواصلتوا معانا من البدايه ويمكن وفرنا عليكم عناء توصيل المنتجات اللي مامنها فايدة لنا.

No comments:

Post a Comment