Friday, 9 May 2014

My Trip to the US: Las Vegas رحلتي لأمريكا: لاس فيغاس


 ذكرت بالتقارير السابقة إن أجرنا سيارة بلوس أنجلوس فقررنا نروح لاس فيغاس بالسيارة. الطريج تقريبا 4 ساعات والكل نصحنا نمشي الصبح لأن كان يوم الجمعة وبداية ويكند ووايد ناس يروحون فيغاس بالعطلة فيعلقون بالزحمة بالساعات. ومثل ماقالوا حاشتنا شوي زحمة بالطريج. الطريج صحرا وحدة ممل. وقفنا بوحدة من الاستراحات كانت محطة قطار وحوالينها مطاعم حتى ماكدونالدز اللي هناك على شكل قطار. ومن توصلون الجسر اللي فيه تماثيل غزلان يعني وصلتوا.









المكان المشهور في لاس فيغاس اهو شارع لاس فيغاس بولفار اللي تكون على امتداده الفنادق تقريبا من فندق لوكسور (الهرم) لي فندق انكور. وياخذ منكم الشارع ساعة ونص عشان تمشون الشارع من أوله لي اخره (مشي). عشان جذي حجزنا فندق يكون بنص الشارع.

حجزنا بفندق فيدارا لسببين أول شي موقعه لأنه بالنص وفيه جسر وقطار يربطه بأشهر فندق فيلاجيو وفندق آريا ومجمع كرستال. ثاني سبب ان مافيه كازينو فمايكون زحمة مثل باجي الفنادق خاصة بحمام السباحة ومايصير يدخله أي أحد لازم يكون عنده المفتاح فأمان. الفندق فيه ستاربكس وكافيه ثاني باللوبي وفيه سبا. الغرفة واسعة وشرحة ونظيفة.













لاس فيغاس أشهر مافيها فنادقها وكل فندق له طابع وثيم خاص وأغلب الفنادق الكبيرة فيها سوق يظل مفتوح لي 12 بالليل.

1- فندق بلاجيو:
من أقدم الفنادق وأشهرها وفيه النافورة الراقصة المشهورة اللي دبي سووا نفسها.





والفندق داخله حديقة ومحل حلويات فرنسي اسمه جون بول فيه أكبر نافورة شوكولاته في العالم. وفيه بوتيكات راقية مثل إرميز وشانيل وفندي.








 

والفندق ينعرض فيه عرض سيرك دو سولي "أو". وايد حلو الشو بس ممنوع التصوير. التذاكر حجزناهم أونلاين قبل اسبوع وكان صعب نحصل كراسي يم بعض.



 2- فندق سيزر بالاس:
من أشهر الفنادق طابعه روماني وطلع في فيلم هانغوفر ومسلسل فريندز. تابع له مجمع حلو اسمه فورم وأغلب محلاته بوتيكات راقية مثل فندي ولوبوتان وغيرهم.




 وينعرض فيه حفلة سيلين ديون




3- فندق باريس:
فيه مجسم مصغر لبرج ايفل وقوس النصر. ديكوراته من داخل حلوة فرنسية


 


 


4
- فندق نيويورك نيويورك:
الفندق عبارة عن كذا مبنى وكل مبنى يمثل مبنى مشهور بنيويورك وفيه مجسم تمثال الحرية مصغر وقطار سريع.





5- فندق فينيشيان وفندق بالازو:
تصميم الفندق عبارة عن مدينة فينيسيا الإيطالية مصغرة. وداخله تقدرون تركبون قوالرب الغندولا وتشوفون عرض مسرحي. الفندق فيه سوق حلو أغلبه بوتيكات راقية وجربنا مطعم سامبا سوشي الياباني البرازيلي.









 







6- فندق ماندلاي بي وفندق لوكسور (الهرم):
فندق لوكسور (الأقصر) طابعه فرعوني وفيه مجسم مصغر لأبو هول وينعرض فيه عرض الساحر كريس إينجل ومعرض تايتانيك. فندق ماندلاي بي مشهور بالزجاج الذهبي وفيه من أشهر الأكواريوم في أمريكا. رحنا الأكواريوم بس كان وايد زحمة نطرنا تقريبا ساعة الا ربع فأنصح تحجزون التذاكر أونلاين. وفي تذكرة عليها عرض تدخلون الأكواريوم ومعرض تايتانيك وتشوفون النمر الأبيض وعرض الدلافين في فندق ميراج بسعر مخفض.





7- فندق ام جي ام:
الفندق كان مشهور بالأسد اللي فيه بس مات وماحطوا ثاني بداله. الفندق فيه كافيه طابعه استوائي اسمه رين فوريست وفيه عرض سيرك دو سولي "كا" كان وايد حلو وعرض الساحر ديفيد كوبرفيلد ماحبيته الساحر كان ماله خلق وبس جم خدعه كانت حلوة وضيع الوقت على خدعة بايخة مع مخلوق فضائي الصراحة الخدع اللي كنت أشوفها له أول بالتلفزيون وايد أحلى. وبكل العروض ممنوع التصوير.

 
 







8- فنادق ثانية:

فندق فلامينغو يعتبر من أقدم الفنادق وفيه طيور فلامينغو ووراه قليلبة (عجلة) تعتبر الأكبر بالعالم.







 فندق ترامب


فندق واين فيه عرض سيرك دو سولي "لو ريف" وفيه سوق.


فندق إكسكاليبر طابعه قلعة
 


فندق تريجر آيلاند فيه سفينة قراصنة وقبل كانوا يسوون فيه عرض وقفوه العام.


فندق بلانيت هوليوود وحاليا فيه حفلة بريتني سبيرز


 من ناحية السوق فيه مجمع كريستال صغير وفيه بوتيكات بس مثل ديور وتوم فورد ولوي فويتون وغوتشي. وفيه مجمع فاشن شو يديد وفيه ميسي ونوردستروم وساكس ونيمن ماركس وديلارد ومحلات ثانية ومطاعم وكافيهات. والشارع نفسه فيه محل ام اند امز ومحل كوكا كولا ومحلات تذكارية. 




 أما الآوتلت في اثنين تابعين لنفس الشركة واحد نورث والثاني ساوث. شفت محلات كل واح فيهم أونلاين وطلع نورث فيه محلات أكثر. الآوتلت أغلبه محلات أمريكية مثل رالف لورين ومايكل كورس وتوري بيرتش وكيت سبيد وكوتش ودوني اند بورك وديزني ومحلات رياضة. الماركات العالمية كانت فيراغامو وبربري بس. وفيه مطاعم مثل ديري كوين وتذكرنا الماضي الجميل :)





من الكافيهات اللي جربناها كافيه هارلي ديفيسون. المنيو حلو والخدمة ممتازة بس الصدمة لما لقيت شعرتين في صحني. قلت حق الجرسون واعتذر وشال الطلب من الحساب وكان راح يبدل الطبق بس انا لاعت جبدي وقلتله مابي شي بداله.

 







من لاس فيغاس (ولاية نيفادا) تقدرون تروحون بالهليكوبتر الغراند كانيون (ولاية أريزونا) وتشوفون الوادي والجبال والسد.التذاكر تنباع أونلاين وبالمحلات.



رحلة العودة كانت من لاس فيغاس لي نيويورك بعدين لي لندن. مطار فيغاس وايد قريب وصغير وفيه شوية محلات ومطاعم وفيه محل الكاكاو المشهور إيثل ام.










وانتهت رحلتنا في أمريكا. وايد استمتعت فيها. اللي وده يروح أمريكا يحتاج شهر تقريبا عشان يشوف الولايات والمدن الحلوة كان ودي أروح فلوريدا بعد بس مامدانا. كل مدينة تحتاج عالأقل 5 أيام عشان تشوفون الشغلات الحلوة فيها. ونصيحة لاتروحون أمريكا وقت العطل مثل الإيستر والصيف والكريسماس لأن وايد زحمة.

تقارير رحلة أمريكا:

4 comments:

  1. Loved your reports, I must include Las Vegas soon <3

    ReplyDelete
  2. اف اخيتي شوقتيني درست بuk ولفيت الدنيا بس امريكا مارحت
    يبيلي اتزوج واخذ وحده تفهم مثلج عشان نستانس صج صج قويه رحلتج وقعدت اكبتجر الصور لاني احتمال بروح بالاشتا 😍🌸

    ReplyDelete
  3. خيتي عندج تويتر لاني بكلمج وماعرف حق هذا هالوبسايت بلوقر مادري شسمه

    ReplyDelete