Tuesday, 6 May 2014

My Trip to the US: California (Los Angeles) (رحلتي لأمريكا: كاليفورنيا (لوس أنجلوس

رحلتنا من نيويورك لي لوس أنجلوس كانت على متن خطوط دلتا. مطار جي اف كي مجددينه وفيه محلات أكثر من قبل. الطيارة كانت كبيرة ونظيفة وكراسيها مريحة ومزودة بشاشات.








أول ماوصلنا أخذنا الباص اللي يودينا المكاتب التأجير التابعة للمطار. كنا حاجزين سيارة أونلاين من مكتب هرتز اللي يعتبر من أكبر مكاتب تأجير السيارات. قبل كنا مجربين افيس وبدجيت وماكان عندنا أي مشكلة معاهم. مكتبهم كان كبير بس زحمة نطرنا تقريبا ساعة على ما وصل دورنا واخرتها قالنا السيارة اللي حاجزينها مو موجودة راح أعطيكم سيارة أفخم بدالها بدون أي تكلفة. عطانا سيارة فخمة بس حجمها صغير ماكفت أغراضنا واخرتها ساحبين منا فلوس زيادة. كان ليل وكنا دايخين وتعبانين قلنا نبدل السيارة ثاني يوم ولما اتصلنا فيهم عشان يعطونا سيارة أكبر كان كل موظف يتهرب ويحولنا على موظف ثاني عقبها بيومين حصلنا السيارة. باختصار لا تأجرون معاهم حتى لو كانوا أرخص شركة لأن راح يأذونكم والفاتورة النهائية تطلع ضعف اللي كنتوا بتدفعونه.


1- بيفرلي هيلز:
سكنا في فندق سيكستي (تومسون سابقا) موقعه ممتاز في بيفرلي هيلز من أرقى المناطق في لوس أنجلوس قريب من روديو درايف. الفندق نظيف ومجدد بس للأسف مو بالكامل ففي قطع أثاث قديمة كان المفروض يبدلونها. فيه قعده بالروف عند حمام السباحة حلوة خاصة للي يحبون يسهرون بالليل.





تريقنا في مطعم تركي اسمه ماماز سيكريت ووايد مشهور بين الخليجيين. الأكل عنده وايد لذيذ.


 

















 شارع ويلشر بولفارد وروديو درايف من أشهر الشوارع اللي فيها بوتيكات راقية وفيها دبارتمنت ستور نيمن ماركس وساكس.












لوس أنجلوس اهي المدينة اللي طلعت فيها هبة الكب كيك فتوقعنا نشوف وايد محلات حلويات. شفنا محل كيك بس يبيع نكهات مختلفة من البراونيز مو الكب كيك.

 جربنا النكهات الكلاسيكية الشوكولاته والجوز والريدفلفليت وأخذنا بعد الكوكيز ان كريم. طعمهم كان حلو بس حجمهم وايد كبير فيغث.
 

بالصدفة شفنا معرض ورنر برذرز للتلفزيون والأفلام حاطين فيه ملابس من المسلسلات والبرامج اللي من انتاجهم مثل فرندز وسينفيلد وسمول فيل وبيغ بانغ ثيري وغوسيب غيرل وبريتي ليتل لايرز وغيرهم.



























مجمع بيفرلي هيلز داخله ميسيز وبلومنغديلز بس مافيه محلات وايد اهو شكله يخدع من بره وايد ضخم بس أغلبه مصافط حتى مافيه سينما وبس جم مطعم! وقباله فيه صيدلية وسوبرماركت تارغت.


 

ولما شفنا ان مافيه سينما رحنا مجمع ثاني مفتوح اسمه ذاغروف يعتبر أفضل مجمع بلوس أنجلوس بس لما وصلنا كانت الساعة 10 والمحلات مسكرة بس السينما والمطاعم فاتحة. فيه محل أبركرومبي اند فيتش وفيه محل نوردستروم. المكان وايد حلو خصوصا القعدة عند النافورة.






وغير هالسوق في آوتلت كبير بس مارحناله اسمه دزرت هيل

2- هوليوود:
من أشهر معالم لوس أنجلوس اهو شارع هوليوود اللي فيه شارع النجوم وقاعة دولبي اللي يسوون فيها حفل الأوسكار

 



أخذنا جولة داخل قاعة دولبي وشفنا مسرح حفلة الأوسكار بس ممنوع التصوير داخل. المكان حلو فيه كافيهات ومطاعم ومحلات.










 هالمحل وايد عجبني فيه هدايا تذكارية لها علاقة بالأفلام وبنفس الوقت اهو محل حلويات وكاكاو وعنده شغلات غريبة
 





النجمة اللي عليها اسم الملاكم محمد علي اهي النجمة الوحيدة اللي معلقة بالطوفة مو عالأرض. الملاكم طلب منهم انها تتعلق لأن فيها اسم الرسول صلى الله عليه واله وصحبه واهم احترموا طلبه.




وكان فيه متحف صدق أو لاتصدق بنفس المكان بس مادخلناله لأن شايفين اللي بلندن. وعقبها رحنا نصور عند لوحة هوليوود اللي فوق الجبل

 

وتعشينا بمطعم إيراني نغير شوي عن المطاعم الأمريكية

 






 تقارير رحلة أمريكا:

No comments:

Post a Comment