Saturday, 3 August 2013

Rio Churrascaria Restaurant مطعم ريو البرازيلي

صديقتي البرازيلية كانت وايد تمدحلي الأكل البرازيلي خاصة اللحم بعد مادرت إني من محبين اللحم المشوي قالتلي لازم تجربين مطاعمنا بس انا ما أحب اكل لحم بديرة غير مسلمة. فوايد استانست لما سمعت إن مطعم برازيلي يديد اسمه ريو فتح بالكويت (خاصة إن أول مطعم برازيلي فتح محد مدحه). واليوم سنحت لي الفرصة إني أروح وأجربه عالفطور.
أول مادخلنا رحبوا فينا وخلونا نختار طاولتنا. كان المطعم شبه فاضي (قعدت أصور على راحتي). المكان هادي وحلو للي يحبون الجو الرومانسي لأن إضاءة خافتة بالليل. المكان أغلبه زجاج ومرايات ويعطي ايحاء ان المكان واسع وشرح.




وأول ما قعدنا شرحولنا طريقة المنيو. الطبق الرئيسي يكون ثابت عبارة عن كمية غير محدودة من اللحوم + سلطة من اختيارك + اطباق جانبية غير محدودة بسعر 15 دك للشخص. المشروبات والحلو سعرهم مو مشمول.


طلبنا سلطة السالمون وسلطة نيسواز. والأطباق الجانبية اخترنا البروكلي، حلقات البصل، الموز المقلي، بطاطس ريو والتابيوكا. وأول شي يابولنا كان التمر المحشي مكسرات ومعجنات مقلية صغيرة مو محشية.







سلطة السالمون

الأطباق الجانبية

حلقات البصل والتابيوكا

البطاطس والبروكلي والموز المقلي
السلطات والأطباق الجانبية كانت عادية بس السالمون كان لذيذ والموز المقلي كان تجربة شي يديد لا باس فيه. والمشروبات عندهم تشكيلة من الكوكتيلات والمشروبات الساخنة. طلبنا بينا كولادا و وترميلون.


وبعدها صار دور اللحم. وكل شخص عنده بطاقة عبارة عن دائرة لونها أخضر ولما تقلبونها تصير باللون الأحمر. الهدف منها ان اذا تبون يقدمون لكم اللحوم تخلونها عاللون الأخضر واذا تبونهم يوقفون الخدمة على ما تخلصون اللي بصحنكم أو لأنكم شبعتوا تحطونها عالأحمر.من اللحوم اللي قدموها لنا قلوب دجاج، صدور دجاج (نوعين) أنواع من ستيكات البقر والغنم والريش واللحم الطري، سوسج الدجاج واللحم، الربيان، والأناناسة المشوية المبهرة بالدارسين (قرفة)





















اللحم والدجاج وااااااااااااايد لذيذ واحنا اخترناه "ميد ويل" وصج طلع مثل ما بغيناه. التتبيلات ولا أروع والطعم بمنتهى اللذة. الربيان عادي والصوصج وايد مبهر

عقبها كنا شبعانين ومابغينا نطلب حلو بس قلنا إذا في شي برازيلي سبيشل لازم نجربه. وشفنا بالمنيو كريم كراميل على الطريقة البرازيليه. ماحسينا بفرق بينه وبين الكريم كراميل العادي بس بالنهاية طعمه جيد.





بشكل عام وايد عجبنا الأكل وراح نكرر التجربة مرة ثانية. أنصح فيه محبين اللحوم والمفترسين مثلي ;)

 
المطعم مكانه في شارع علي السالم برج الجوهرة (نفس البرج اللي فيه طيران الإماراتية ومطعم تراينغل ومطعم أوبون)



No comments:

Post a Comment