Sunday, 18 August 2013

رحلتي إلى مسقط عمان الجزء الخامس والأخير My Trip to Muscat Oman Part 5

في الجزء الخامس والأخير راح أذكرلكم الأماكن الحلوة واللي أنصحكم تزورونها في مسقط عمان. بما أن رحلتنا كانت 3 أيام مامدانا نزور كل الأماكن. مسقط يبيلها على الأقل 5 أيام عشان تستكشفونها عدل.

أول معلم اهو مسجد السلطان قابوس الكبير ويعتبر من أكبر المساجد وكان فيه أكبر سجادة مسجد في العالم قبل ما ينبني مسجد الشيخ زايد في أبوظبي. صحيح إن مسجد الشيخ زايد أكبر مسجد بس من ناحية الزخارف مسجد السلطان قابوس تفوق عليه.
*الرجاء عدم أخذ الصور بدون استئذان.












 المسجد مفتوح للزوار يوميا ماعدا الجمعة من الساعة 6 صباحا حتى 11 صباحا ويجب الإلتزام باللبس المحتشم للرجال والنساء.



طبعا فيه مصليين واحد للرجال وواحد للنساء


















عجبني اهتمامهم بالمعاقين


بما أن جو عمان يعتبر استوائي وحار ورطب طول السنة فلازم يحطون تهوية للمرات. من بعد زيارتنا للمسجد سحنا


حديقة المسجد كبيرة وحلوة بس من الحر والرطوبة ماقدرنا نتمشى فيها. ماشالله ريحة الورد معطرة المكان.



هالطير كان مناشبني أبي أصوره واهو يشرب ماي مو مخليني كل مايشوفني ينخش




المكان الثاني اللي أنصحكم تزورونه اهو دار الأوبرا. حتى لو كنتوا ماتحبون العروض المسرحية والموسيقية القاعة ديكوراتها روعة من داخل ماقدرنا نشوفها لأن وصلنا متأخرين. وقت الزيارة من 8-10 الصبح فقط وبغينا ندخل عرض طلع شهر 8 مافيه عروض. فلسنا!







مدخل دار الأوبرا وشباك التذاكر







ماشالله شي راقي جدا وكان ودنا نحضر للفرقة الموسيقية العمانية. ان شالله المره الياية. وعلى فكرة الحين قاعدين يبنون دار أوبرا في دبي. عقبال عندنا

المبنى الثاني الملاصق لدار الأوبرا (الأوبرا جالاريا)  عبارة عن محلات راقية للساعات والمجوهرات والتحف والعطور ومراكز التجميل ومحلات الحلويات والتذكارات والمطاعم والكافيهات



















وبما أن حبايبي الفولورز مدحولي كافيه ريشو قررنا نجربه واهو بالأصل كافيه انجليزي في لندن







حبيت كل شي في الكافيه القعدة والأكل والستاف. السعر شوي أغلى مقارنة بكافيهات الكويت لأن عندهم ضرايب

عصير منجا بالايسكريم كان حده منعش من بعد الحر والرطوبة

بقايا الخبز بالثوم والجبن من كثر ماكان لذيذ نسيت أصوره

عرض خاص لوقت الشاي

طلبنا كلاب ساندويتش


هالقهوة موطبيعية خياااال


كافيهات ومطاعم ثانية في دار الأوبرا




منظر دار الأوبرا روعة بالليل


المكان الثالث اللي لازم تزورونه اهو سوق مطرح الشعبي. فيه تذكارات وشغلات تراثية واللبس العماني ومحلات الحلوى العمانية والدراريع والعطور والعطارين ومطاعم الشاورما والأكلات الخفيفة والعصائر. أغلب الأسواق تفتح على فترتين من 9 أو 10 لي 1 الظهر وبعدين من 5 لي 9 أو 10 بالليل


سوق مطرح مكانه قبال الكورنيش
شفنا الناس قاعدة تمشي مع ان الجو رطوبة بعدين لاحظت قواري (دراجات هوائية) للإيجار نفس اللي في لندن.  وبعدها شفت لوحة إن في شهر رمضان القواري ببلاش! وايد احترمت حرصهم على الصحة. عقبال عندنا

















زرنا مجمع بريق الشاطىء في منطقة القرم اللي تعتبر منطقة تجارية وراقية. أغلبه مطاعم وفيه محلات عادية للاكسسوارات وعيادة أسنان وصالونات تجميل. مدحولنا مطعم أوبار فرحنا جربناه




مطعم البرجر الكويتي ماشالله كان زحمة






المطعم فكرته وايد حلوة ان يقدم الأطباق العمانية التقليدية بطريقة مودرن وعنده أطباق أجنبية عشان يرضي كل الأذواق











القعدة حلوة وهادية وكنا والستاف تعاملهم حلو ورحبوا فينا

طلبنا مقبلات مشكلة وكانت عجيبة وطريقة تقديمها راقية



العصاير اخترنا شمام وعصير خوخ كانت عادية


طلبنا طبق الشوا (لحم مشوي) التقليدي مع عيش القابلي. ودجاج بالبقسماط محشي جبن



والحلو طلبنا شي غريب كان بف باستري محشي حلوى عمانية وفوقه صلصة الكاراميل ويقدم معاه ايس كريم فانيليا





المطعم فايز بجوائز وصج الأكل ناطع وأنصح فيه


وزرنا مجمع مسقط سيتي سنتر ويعتبر أكبر مجمع . محلاته أعتبرها عادية ما في شي غير عن اللي بالكويت









يا حلو اسم الكويت

تغدينا في مطعم غورميه بورغر
ومن الأماكن اللي حرص زوجي إن نزورها متحف الجيش وراح وحطيته في بوست بروح هنا



من الأماكن اللي كان ودي أزورها بس ما مدانا الوقت
- مصنع عطور أمواج
- مصنع الحلوى العمانية
- قلعة نزوى وجبرين
- متحف التراث العماني
- الوديان
- حفرة الماي Sink Hole
- مجمع القرم سيتي سنتر
-مطاعم The Wave

مقتطفات









بشكل عام وايد استمتعت بالرحلة وان شالله راح أزورها مرة ثانية. الشعب العماني شعب طيب وكريم لأقصى الحدود. ماشالله كذا مرة من يسمعون إن احنا كويتيين يضيفونا ومايقبلون منا فلوس. والحلو إن في أغلب الأسواق خاصة الشعبية يقبلون بكل العملات الخليجية. ومن ناحية الجو فهو استوائي ورطوبة والظهر يكون حار.

3 comments:

  1. الله يعطيكم العافية

    ReplyDelete
    Replies
    1. الله يعافيكم وشكرا عالمتابعة

      Delete
    2. حسيت نفسي اتمشى معكم

      Delete