Thursday, 3 January 2013

Pizetta, Junkyard & Korea Grill Restaurants

مع هالجو البديع الواحد يشتهي يترييق بره. قررنا نجرب ريوق بيزيتا البدع لأن وايد ناس مدحوه. وصلنا 10:15 والمكان كان فاضي وماكان في أحد بالطابق العلوي لاستقبالنا. قعدنا ونطرنا شوي بعدين يابو المنيو. المنيو كان متنوع بس ماكانوا موضحين كل شغلة عبارة عن شنو فلازم نسأل الجرسون وغير هذا المنيو سايح على بعضه مو مقسم. المقبلات طلبنا هاش براون والأطباق الرئيسية فريتاتاfrittata اللي اهي عبارة عن بيض مع خضار بالفرن. وطلبنا كروك مونسيوcroque monsieur اللي اهو شريحة توست مسيح عليها جبن (مع إن العادة يكون ساندويش مو بس شريحة توست) وساندويش ديك رومي. والمشروبات طلبنا قهوة باردة بالموز وكابتشينو. بشكل عام الأكل كان لذيذ والقعدة حلوة.




بما إني من محبين البرجر قررت أجرب مطعم جانك يارد بما انه شي يديد. ما كان لي خلق أطلع فدخلت سايت طلبات  www.talabat.com وطلبت تشيلي فرايزchili cheese fries (مع انه معطينه نجمة وحده) جنك برجر Junky burger وفيريرو ميلك شيك والحلو chubby bites. الفرايز كانوا بس حاطين عليه الهالابينو والبصل أما صلصة اللحم المفروم والجبن كانوا على جنب اللي ماعجبني إن الجبن ماكان سايح فهل لازم احنا نسخنه؟!!! فطبعا ما أكلته لأن أحلى مافي التشيلي فرايز اهو الجبن السايح. باجي الأكل كان لذيذ. المطعم مكانه في أبو الحصانية ذا فيليج.


من فترة طويلة وأعز صديقاتي تقوللي لازم تجربين الأكل الكوري. ولأني أحب الأكل الصيني والياباني فقلت لازم أجر. للأسف مافي مطاعم كبيرة بالكويت. اللي نعرفهم مطعم Arirang في فندق Swiss Bel Hotel  بجانب مجمع المثنى ومطعم Korea Grill  في فندق Kuwait Hayatt ومكانه بالشعب والثالث Singarea  بس للأسف أغلق. قررنا نروح كوريا غريل. المكان عادي ومافيه ديكورات تبين نوعية المطعم بس الأكل كان لذيذ وكان في كذا عايلة كورية بالمطعم. أول ما قعدنا يابولنا ضيافة عبارة عن خضار مسلوقة ومخللات. للمقبلات طلبنا fried dumplings  وكانت محشية لحم مفروم غير عن gyoza الجيوزا اليابانية أوdim sum  ديم سم الصيني اللي يكون محشي خضار أو ربيان أو دياي. والطبق الرئيسي  طلبنا أشهر أطباقهم bulgogi بلقوقي واهو عبارة عن لحم مفتت مع الخضار يشبه teppanyaki التبنياكي الياباني بس وايد ألذ وياكلونه مع الخس أو الرز الأبيض. وطلبناchicken sweet n sour  دجاج حامض حلو. واللي عجبني فيه إن قطع الدجاج مغلفة بالبقسماط والخضار كانت فريش مو مذوية من الطبخ. ويابولنا شوربة طحالب على حسابهم صديقتي وايد حبتها.



No comments:

Post a Comment