Thursday, 1 November 2012

Euthanasia الموت أو القتل الرحيم



أكتب لكم هالموضوع اليوم ودموعي على خدي بسبب اللي مريت فيه وصارله ساعات معدودة وحبيت اشارككم فيه  وخاصة انه شي ماتوقعت ان في يوم من الايام يصيرلي شخصيا وكنت اشوفه بالافلام 

اليوم بالنسبة لي ماكان كأي يوم عادي ولو ان بدايته كانت مثل اي يوم يمر علي. اليوم   قررنا الوالد والوالدة وانا ان نتغدى برة البيت وبرجعتنا وقريب من فريجنا والا بقطوة بنص الشارع شيرازيه مافيها قوة انها تمشي وكان واضح انها بحاله مو طبيعية . وأول ما وصلنا البيت قررت اني ارجع لها لان قلبي ماطاوعني اخليها بهالحاله واخذت الصندوق الخاص في دكستر - القطو اللي عندي بالببت- ورجعنا لان المسافة مو بعيدة بالمرة . لقينا القطو عالرصيف بحاله مزرية والواضح ان داعمته سيارة واحد الارجل الخلفية مكسورة .وقبل ما ناخذة مر شاب ومعاه علبتين تونه الله يجزاه خير ويقول توني شلته من نص الشارع اهيا لكم ؟ وجاوبناه لأ بس هم احنا شفناها وقلنا ناخذها.  أخذناها والا باحد الاطفال من احد البيوت يقول هذي قطوتي انا اعطيها أكل كل يوم  وطبعا سألناه ليش هذي حالتها كل دقيقه يألف قصة شكل وبالاخير بعد ما لجنا مشينا وعلى طول عالبيطري  .

 بعد الفحص اتضح ان صارله ايام على هالحال لدرجه أن الدود للاسف أي نعم دود كان ينهش فيه وان عظام احد الارجل الخلفية مكسرة . عطانا الدكتور البيطري خيارين أما ابرة ( الموت الرحيم ) أو ممكن في أمل ضئيل أن يتعالج ولكن يتكلف مبالغ كبيرة والشفاء مو مضمون بسبب مرور أيام عديدة على الحادث.

مع الأسف اضطرينا ان ناخر الخيار الأول  وحسيت اني في فلم اجنبي بس ان بالافلام بمجرد ما الدكتور يعطي الحيوان الابرة والا هو خلاص  أثاري السالفة طلعت هي عدة  جرعات من المخدر لاكثر من عشر دقايق   وانا كنت على وشك ان يغمى على وانا اشوفه  شوي شوي ينام ولين الدكتور اخذ السماعه وحطها عليه ينطر ان القلب يوقف وكان قلبي بيوقف معاه 

الدكتور وهو ماسك السماعه يتأكد من توقف القلب

رجائي لكل اللي يحبون الحيوانات انهم يعتنون فيها وان لها روح وأحاسيس وليست لعبة جميله تحبونها فترة وترمونها . اذا في احد عنده حيوان ومايقدر يعطيه العناية الكافية ففي عندنا بالكويت ملاجئ للحيوانات تعتني فيها وتساعد حتى على ايجاد منزل لها مع ناس يقدرون فعلا ان يعتنون فيها 


No comments:

Post a Comment